Делегација на Ветеринарната комора на Република Северна Македонија учествуваше на „Ветеринарни денови 2026“ во Пула, Република Хрватска

Во периодот од 22 до 25 октомври 2026 година, во Пула, Република Хрватска, се одржа традиционалниот научно-стручен собир со меѓународно учество „Ветеринарни денови 2026“, најголемиот годишен едукативен и стручен настан на ветеринарната професија во Хрватска, организиран од Хрватската ветеринарна комора, Ветеринарниот факултет при Универзитетот во Загреб и Хрватскиот ветеринарен институт.

На овој значаен настан, Ветеринарната комора на Република Северна Македонија ја претставуваше делегација во состав д-р Жарко Михајлоски, претседател на Комората, и д-р Томислав Николовски, извршен директор.

На собирот учествуваа бројни истакнати предавачи, научници и стручњаци од Хрватска и од други земји, кои преку своите излагања ги претставија најновите научни сознанија, практични искуства и актуелни предизвици во различни области на ветеринарната медицина. Меѓу предавачите беше и проф. д-р Ромел Велев од Факултетот за ветеринарна медицина во Скопје, кој со своето учество даде придонес кон меѓународната размена на стручни и научни знаења.

Особено значење на настанот му даде присуството на високи претставници на државните институции на Република Хрватска, претставници на ветеринарните комори од регионот, како и на раководството на Федерацијата на ветеринари на Европа (FVE).

Во рамките на собирот, претставниците на Ветеринарната комора на Република Северна Македонија остварија средби и непосредни контакти со повеќе истакнати претставници на хрватските државни институции, меѓу кои и г. Давид Влајчиќ, потпретседател на Владата на Република Хрватска и министер за земјоделство, шумарство и рибарство, како и г-ѓа Маријана Петир, претседателка на Одборот за земјоделство при Хрватскиот сабор.

Г-ѓа Маријана Петир е добро позната и во македонската јавност по нејзината долгогодишна поддршка на европските интеграции на нашата држава и заложбите за нејзино приближување и полноправно членство во Европската Унија, особено за време на нејзиниот мандат како пратеничка во Европскиот парламент.

Присуството на овој реномиран меѓународен собир претставуваше одлична можност за воспоставување и продлабочување на професионалните контакти со претставниците на ветеринарните комори, европските ветеринарни организации и академската заедница. Во непосредните разговори беа разменети мислења и искуства за актуелната состојба во ветеринарната професија во регионот, предизвиците со кои се соочуваат ветеринарните лекари, како и можностите за натамошна соработка и заедничко дејствување во насока на унапредување на професионалниот статус и условите за вршење на ветеринарната дејност.

Особен впечаток оставија високото ниво на организација на настанот, како и присуството и поддршката на највисоките претставници на хрватските државни институции, со што уште еднаш беше потврдено значењето и угледот што ветеринарната професија и Хрватската ветеринарна комора го уживаат во институционалниот и општествениот живот на Република Хрватска.

Ваквиот однос на државните институции кон ветеринарната професија, препознавањето на нејзината незаменлива улога во заштитата на здравјето на животните, јавното здравје и безбедноста на храната, како и почитувањето на ветеринарната комора како релевантен професионален партнер, претставуваат позитивен пример и практика што заслужува да биде следена и во нашата држава.

Ветеринарната комора на Република Северна Македонија изразува благодарност до Хрватската ветеринарна комора и нејзиниот претседател Иван Земљак за поканата, исклучителното гостопримство и одличната организација на настанот.

Комората и во иднина ќе продолжи активно да ја развива меѓународната соработка, да ја зајакнува својата поврзаност со регионалните и европските ветеринарни организации и да ги промовира добрите европски практики во интерес на ветеринарната професија во Република Северна Македонија.