ОДБЕЛЕЖАН СВЕТСКИОТ ДЕН НА ВЕТЕРИНАРНАТА МЕДИЦИНА

По повод одбележувањето на Светскиот ден на ветеринарната медицина, вчера на 25.04.2025 година во хотел Континентал во Скопје, Ветеринарната комора на Р.Македонија одржа состанок со своите членови со учество на Националниот координатор за безбедност на храна, ветеринарна и фитосанитарна политика при Владата на Р. Македонија д-р Верче Мицевска и државниот советник за храна при Агенцијата за храна и ветеринарство д-р Светлана Колариќ.

На состанокот се дискутираа клучните предизвици со кои се соочува ветеринарната професија и изнаоѓање на соодветни решенија и беше донесена Декларација за статусот и иднината на ветеринарната медицина во Р.Македонија.

ДЕКЛАРАЦИЈА

за статусот и иднината на ветеринарната медицина во  Република Македонија

Ние, членовите на Ветеринарната комора на Република Македонија, изразуваме сериозна загриженост за актуелниот статус на ветеринарната медицина во нашата држава и укажуваме на потребата од итни и суштински реформи и поддршка за одржлив развој на оваа професија со критична улога во заштитата на здравјето на животните, безбедноста на храната и јавното здравје.

1. Значењето на ветеринарната медицина во општеството

• Ветеринарната медицина претставува мултидисциплинарна дејност која опфаќа:
• Клиничка пракса и дијагностика;
• Превенција и контрола на заразни болести;
• Обезбедување на безбедна и квалитетна храна од животинско потекло;
• Придонес во зачувувањето на јавното здравје преку борба со зоонози, концепт ЕДНО ЗДРАВЈЕ

2. Постигнувања и предизвици

Благодарение на стручноста и ангажманот на ветеринарно-здравствените работници, доктори по ветеринарна медицина и ветеринарни техничари:

• Република Македонија не е зафатена од сериозни епидемии кај животните;
• Не се регистрирани значајни случаи на небезбедна храна;
• Навремено се преземаат мерки за болести како африканска свинска чума, син јазик, чума кај малите преживари, беснило, бруцелоза итн.
• Фармерите добиваат стручна поддршка и сервис во секојдневната работа.

И покрај ова:

• Ветеринарната професија е најнископлатена меѓу високообразованите професии во државата (според податоци на ДЗС);
• Во државата функционираат три факултети за ветеринарна медицина, кои заедно произведуваат помалку од 10 дипломирани студенти годишно;
• Околу 50% од докторите по ветеринарнa медицина се вработени во јавниот сектор, што ја ограничува можноста за развој на приватната ветеринарна пракса;
• Општествената перцепција за улогата на ветеринарите останува недоволно развиена.

3.  Апел до институциите

Со оваа декларација бараме:

• Препознавање и афирмација на значењето на ветеринарната професија во националната политика за јавно здравје, земјоделство и храна;
• Финансиска и институционална поддршка за развој на ветеринарната дејност;
• Стимулација на млади кадри за студирање и професионален развој во ветеринарната медицина;
• Јакнење на капацитетите на Ветеринарната комора и соработка со сите засегнати страни во креирањето на стратешки политики.

ЗАКЛУЧОК:

Ветеринарната медицина е витален дел од јавното здравје, безбедноста на храната и економијата. Препознавањето и развојот на оваа професија не е само стручна обврска, туку и општествена потреба. Повикуваме на итно дејствување за зачувување и зајакнување на оваа есенцијална гранка во интерес на сите граѓани на Република Македонија.